MIRROR拒為節目效果出賣粉絲 姜濤:唔會攞佢哋開玩笑 (20:11)

文章日期:2021年04月06日

【今日直擊】人氣男團MIRROR今日亮相「ViuTV 5周年:繼續向前」活動,對於他們日前到梅窩拍攝新節目《調教你MIRROR》,有粉絲「私追」到拍攝場地,情况失控而影響拍攝,姜濤當眾斥責粉絲,令在場的「姜糖」對偶像感失望而鬧出風波,甚至有極端的「姜糖」表示:「捧得紅你都可以踩低你。」

姜濤認真表示:「我想同所有人講,我哋MIRROR每個人,包括我自己,都唔會攞fans嚟開玩笑嘅,節目效果呢啲嘢,我哋冇可能唔經fans同意攞嚟做效果,呢個係絕對唔會發生!嗰日情况係所有嘢都好突發,的確我啲fans多咗啲啲,其實fans本身『私追』都危險,我哋都會危險,嗰日貼得好近,喺馬路佢哋唔睇後面車,好多時抱住一個又要顧住佢哋,又要顧住節目組嘅心情,尤其係喺梅窩我都唔熟悉嘅一個地方,所以我決定行出嚟同佢哋講,除了代表我嘅fans,亦代表所有人心聲去講呢件事,我哋再重申,絕對唔會攞粉絲嚟講笑,唔會為咗節目效果而出賣我自己嘅fans,呢個係絕對唔會發生嘅事情!」

有粉絲聲稱「捧得起你都可以踩低你」,姜濤直言聽到後會感到不開心:「老實講,一定會唔開心,引起大家唔好觀感,我都想同大家再講sorry。可能我講咗啲好重嘅說話,如果畀多次機會我再處理,我會再講得好啲,所以希望理解我哋立場,我哋對每個fans尊重。」

相關新聞:擔任MIRROR真人騷導師 梁祖堯爆Ian喊得最勁

相關新聞:MIRROR粉絲「私追」風波 經理人花姐撰長文解畫

相關新聞:梁祖堯《調教你MIRROR》教趕「姜糖」 網民揚言罷睇:做法好低莊

(即時娛樂)